Koligaganan tana napayang

dii Kombura

Kopisanangan…
ontok tadau kaapat (6.8.2009), songulun mogigion Kg. Tudan Kiulu, Tuaran noiduan ginawo soira nakaampap tana’ nopiang. Isio nopo nga id tindalanon nogi daa do mindahu om moi pokidupot. Nokosupan isio di tana’ napayang hilo’ id pirau talahis tomod i roitan do Kiang o kinoiyonon dau, sumondot do Kg. Tudan. Kikotumbayaan do tana’ dilo napayang sabab naagatan di tana’ mantad tisan talun-talun i pinataam di kuntiriktor momonsoi talun-alun.

Songulun tulun kg dilo pinopoilo do nosunudan no daa dau i kuntiriktor do amu pataam do tana doid kinoiyonon  dilo (id siba di Kiang) nga au tinumboyo dilo kuntiriktor.
Piipiro tulun kg minogitaatabang do minogihum disio soira au’ nokouli doid walai gisom do duo tadau. Kikotumbayaan o tulun kg do nakaampap kanto di tana’ napayang isio soira nokito do au nosimbanan iri kakamot pongintalun dau hiri id sulap do hilo id tumo dau. Nokito diolo i tinan disio di pitangaadau tadau ko-onom, 8.8.2009.
Monongkosiou tokou kumaa di paganakan om tompinai ngaawi noiduanan dau. Sumambayang tokou do insianon no da do Kinorohingan i koduduwo disio. Amen.