Pomilian Woyoon Kampung Kg. Libodon Tudan, Kiulu Tuaran, Sabah.

22.11.2009
Kiulu - Nokorikot / nokouli kogumuan tulun mantad toiko mogigion mantad Kg. Libodon Tudan, Kiulu
Tuaran kumaa doid Kg. Libodon Tudan id suang Watas Tokoro Kiulu, TUaran. Kinoulian diolo nopo nga
montok kopomilian Woyoon Kampung (Head Village) do kawawagu montok do Kg. Libodon Tudan, Kiulu Tuaran.

Sokuukuri do 70 komolohingan om sukod wagu do nokouli ontok tadau dilo. Nokorikot iyolo ngaawi diti do mantad kakadaian toiko
watas suai i kinoiyonon diolo pakaraja. Oponsol o pomilian dilo sabab do mokiganti no i Woyoon Kampung mantad, ii Gundohing KK Gadiman Kambut.
Tumanud di Gundohing Gadiman Kambut, kopotingkadan dau nopo nga sabab no do kolidasan dau i au papasaga dau papanau karaj
sabaagi do Woyoon Kampung.

Sundung potuu do ingkaa nga amu pinotilombus kopomilian Woyoon Kampung sabab no do aiso
kopoilaan poinsurat mantad JKKK kampung dilo. Tumanud di Gundohing Samy Bangud, Upisor PKR Kiulu, apatut do kiharo notis toiko surat kopoilaan kumaa mogigion
kampung, sokuukuri 7 tadau pogulu do papanahon o kopomilian dilo. Piipiro tulun kampung nga
au pinoposudong do pohoroon o kopomilian dilo sabab aiso o surat kopoilaan mantad. Kikotumbayaan do tumanud nopo kooturan nga
mositi do kiwa kopoilaan poinsurat pogulu pohoroon o kopomilian miagal dilio. Iti nopo nga
montok mangantob kobolingkahangan id tohuri tadau.

Sundung ingkaa nga minonimbar om pinaparati i gundohing PKR do pongudiaan ngaawi kahampit.
Koiso nopo nga isai-isai i id kiumur id sawat 18 toun milo dumadi do lansanon toiko Woyoon Kampung.
Isai-isai i kiangkab dumadi Woyoon Kampung nga mositi aiso kiis mahkamah, nobingkarap toiko nokoumbal do nojiil toiko nadanda gisom do RM2000.00.
Pinopoilo nogi isio do koonduan milo nogi do dodion Woyoon Kampung. Ponorikohon toiko puru JKK kampung nga milo nogi do lansanon sabaagi
Woyoon Kampung. Ontok do pogititimungan dilo au noilaan do isai-isai i palansansanon daa do sabaagi Woyoon Kampung.

Pinohuntan o kopomilian Woyoon Kampung Kg Libodon Tudan, Kiulu TUaran ontok

tadau ko-6 Momuhau 2009 . Koontok ilo do tadau minggu, jaam 11.00 kosuabon.

Ontok pinogiruurubaan dilo pinarati tulun kampung ngaawi do:
1. Tulun kampung i milo do momili nopo nga ii tulun mamasok pointopot id Kg. Libodon Tuda, Kiulu.
Au pomilohon do momili i poingiyon toiko kiwalai id Kg. Libodon Tudan nga puru iyau do kampung suai, miagal no do Kg. Bambangan Kiulu po toiko
Kg Poring, toiko suai-suai kampung.
2. Milo do momili i isai-isai nopo puru/mamasok kampung sundung pongundian pomilian tagayo (election) nopo dau nga id watas suai id pogun Sabah diti.
3. Tongondu nga milo do palansanon sabaagi Woyoon Kampung.
4. Isai-isai mamasok kampung i kiumur id sawat 18 toun obuli lumansan sabaagi Woyoon Kampung.
5. Kiwaa nogi sogu tulun kampung do i nopo opili do Woyoon Kampung nga nokoponu kriteria
miagal no do koilo monurat, mambasa om mongintob.

Iso ahal oponsol ontok pinogiruurubaan dilo nopo nga komi di Woyoon Kampung pogulu i Gundohing
Gadiman Kambut:
1. Kinoundarangan nopo disio mantad karaja Woyoon Kampung nga sabab  do kolidasan i au papasaga.
2. Minonongkotoluod isio kumaa rayat/tulun kampung ngaawi sabab sokodung solinaid disio do Woyoon Kampung.
3. Pinolombus nogi disio do au isio ososol kumaa di tulun kampung i mimang do kiginawo daa do popotingkod dau sabaagi do Woyoon Kampung.

NATANTU TADAU POMILIAN KAWAWAGU ONTOK
6.12.2009 (TADAU MINGGU)..JAM 11.OO MINSUSUAB.
POILOON TOINSANAN TULUN MAMASOK KG.TUDAN ( I  AU PO NADADI PURU KG SUAI-SUAI )